bravado behaviour
كلمة اسبانية... نحنا بنستعملها في الطب النفسي كتير جدا لتفسير سلوك بعض من يعيشون تحت مظلة المرض النفسي..
معناها
هو الشخص الذي يظهر الثقة او الشجاعة (في غير موضعها) لينال التقدير من المحيطين بيهو لحظة الحدث ...
ودا حتي في الحياة العامة كتار جدا بعملوا القصة دي ... انو ردة فعلك تجاه موقف ممكن تكون مختلفة اذا كان في زول حاضر الموقف ولا لا...
احيانا احنا ممكن نتجاوز موقف بعينه او نسكت او نتسامح طالما مافي زول غيرنا موجود...
لكن لو بقي في زول حاضر بنحس احنا لازم (نظهر بالمتوقع مننا)... والمتوقع دا في الغالب مرتبط بثقافة المجتمع الاحنا فيهو او اتربينا علي قيمه...
اجبارك علي انك تعمل ردة فعل بس عشان في ناس حاضرين او بحمسوا فيك فيها مرات كتيرة اذي ليك انت لانو مع الاندفاع والضغط المعمول ليك دا ما بتكون حسبتها صاح... هل امكانياتك بتيح ليك الانت ناوي تعمله دا والاصلا هو في المقام الاول مسقط عليك نفسيا بالمحيطين بيك...
كمثال
اللا بخاف ولا بتر قدام العينيه خدر ...
والعينيه خدر دا راكب دبابة
واللا بخاف ولا بتر دا شايل سيف عشر
المعركة من بدت لامن انتهت مااخدت غلوة والواطة اتملت ميتين... لانهم مفروض ما يخافوا ولانو بحمسوا فيهم... ولانهم نفسهم يسمعوا كلام استحسان يشيد برجالتهم... من غير حسابات منهم للحيختو نفسهم فيه
في بيوت خربت لانو الازواج او الزوجات لقوا روحهم (مضطرين) باخدوا موقف لانو الحضر الموقف مستني ردة فعل واحد منهم تجاه الحصل وممكن عادي يلكزك ويذكرك كان عملت فيها مصهين وداير تنسي...
مرات كتيرة سمعت قصص لازواج وزوجات انو الحاجة العملوها كانت نتيجة لوجود اشخاص لحظة حدوث القصة او حتي هم علي علم بيها فبكونوا قاعدين مستنين (النهاية)
او يكون الواقف ليك دا ختاك في الموقف دا تحديدا عشان يجبرك علي عمل تصرف بعينه..
في ناس حوالينا بخشوا في حتات ضيقة شديد عشان الحولهم مستنيين منهم مواقف بعينه
وفي ناس فعلا مستفيدين من ضعف وهشاشة بعض الناس واشتهاءهم وتحرقهم للاستحسان وعشان الجمهور دا يقول واااااااااااااو... عشان الواااو دي مستعد ينقلب اي شيء ... وبعمل اي شيء
وواحدين تنتابهم نوبات كرم حاتمي ليشتري محبة الناس ورضاهم حتي كان يتدين قروش ...
دا البحصل في الحفلات والمغنية تشكر زول يقوم يطلع الحيلته كلها ويديها ليها.. بعيدا من انه عندو ولا ماعندو
بس لانها هي متوقعة (النقطة) دي.. والحولها متوقنعها... وهو لازم وحتما يستجيب
حتي في تعاملنا مع اولادنا وفي اسرنا ... لازم يكون في قصص تضحية (يسير بها الركبان) ....
نحنا بناكل النار... وبنمشي في الجمر... وقصة الراجل القاعد مع ست الشاي وقال ليها داير اولع سيجارتي شالت الجمرة ومدتها ليه.. طوالي جر الكانون وقعد فيهو وقال ليها (من وين اللخت) كناية علي انها حربية وهو الشفت الممسح بالزفت
ودا كلو عبارة عن برافادوا... ماصل في تربيتنا وثقافتنا...
في ناس ممكن يختوا روحهم في خطر... وفي الشغل البدوا ليهم يستمبتوا اكتر من القصة تستحق.... ويمشوا الشغل وهم عيانين مثلا او ما قادرين لدرجة ممكن تحصل ليهم مشاكل وامراض دا كله عشان الحولو يقولوا خطير ...
واظن قصة الزولة الشهبرة الماتت في حق ود راجلها الوقع في الترعة نطت وراهو بالرغم من انو ابوه وامه واقفين يتفرجوا... نجا الشافع وهي ماتت... بس دا كله عشان راجلها الوالد الشافع دا من مره تانية (يحس بعظمتها ونبلها)
وفي زول او زولة مفهمنهم انهم مقطعنها ومافي زول بقدر (بقعد البشرية) دي في مواعينها غيرهم ... فبنادوهم مخصوص عشان بعملوا تصرفات الناداهم دا مستحيل يعملها لانو بكون عارف مغباتها لقدام... فبستغل ضعف القدامه دا وعدم سواءه النفسي
البرافدو حقنا للاسف علي مستوى اشخاص وعلي مستوى مسؤولينا ايا كانوا
بتقال كلام مامسؤول بس عشان استحسان الناس الحولك والكواريك والبهجة
عشان كدة قصة الاستفزاز... وما بتحمل... والكلام الزي دا معظمه سببه انو بكون في زول حاضر او ناس حاضرين فعيب يعني يمشوا من غير ما يشاهدوا عرض ...
كل المودة
تماضر الحسن