اي زول عندو عيال بكون عندو تحديات ان يخلى العبادات من صلاة وصيام تتعمل بالتزام.. ويذكرهم بيها بطريقة حلوة تخليهم هم ذاتهم متشوقين وملتزمين من تلقاء نفسهم ...
احنا الابهات والامهات مهما بلغ تحديثنا (للسوفت وير) حقنا ... الاصل القديم هو القاعد والمسيطر وفي اي نقطة بنرجع نبقي يانا الامهات والابهات بنسخنا التقليدية .. وعشان نكون قادرين نصل لحتة
لا تربوا ابناءكم كما ربوكم اباءكم فهم قد خلقوا لزمان غير زمانكم
محتاجين معينات للحاجة دي .. مامعينات معرفة وبس حتى القدرة علي ابتكار وسايل ماشة مع العصر دا ... انا اتعودت ومن زمان اني اتكلم مع اولاد وبنات اكبر او حتى اصغر من بناتي عشان اقدر اشوف الدنيا دي بعينهم ... اكتشفت قدرتهم علي الخلق والابداع والابتكار مستعملين المتاح دا كله بطريقة اكتر من ممتازة واعنى بالمتاح التكنلوحيا ووسايل الاتصال والمعرفة الرقمية ..
لحدي مااتواصلت معاي ساجدة يوسف طه ... بت اخونا يوسف طه واختنا سامية واحنا عايشين مع بعض في نيوكاسل ... وعرضت علي
App
تم تصميمه خصيصا لرمضان
والله ذهلت لما عملت لي حساب فيه
البنوتة الحلوة دي والمعاها قدروا اشتغلوا علي الاب دا وتم تضمين اي شيء ممكن تتخيلوه او حتى ما تتخيلوه ابتداءا من انك
تعمل مفكرة ببداية الشهر
عباداتك من قراية قران
صلاتك
الرياضة
اقرب المساجد ليك للتراويح وقيام الليل
حتى الاكل في الشهر الكريم مصمن
القران والتلاوة والسور
العيد
صور العيد. والاحتفال بيه
العشرة ايام الاخيرة من الشهر
حتى الالعاب والتسلية
وفي فرصة للاب قريد برضو (اءا بتريدو)،
انا لي اكتر من ساعة بعاين للاب وغلبني اطلع والله ... وحارسله اسي لبناتي طل وطيب لانو دي فكرة عبقرية انو لاول مره حنتوحد في شيء ونعمل الموجود بنفس الطريقة ...
شكرا يا ساجدة ليك للمشاركة وللمجهود العظيم الانت عملتيه ... وشكرا انك فكرت فيني وفي بناتي والفايدة الممكن تحصل لينا وتقوى من قدرتنا علي الصيام بطريقة احسن كافراد وكاسرة ...
كل سنة وانتو طيبين
تماضر
تمر الرضا
https://ramadancompanion.app