بقلم: د.تماضر الحسن (تمر الرضا)
وسط حالة الحزن والغبن والزعل الانا اتكلمت فيها الصباح
فجاة جات الاخبار السعيدة بنجاح اولادنا وبناتنا في امتحانات الشهادة السودانية
كلمة شهادة سودانية براها كدة تمر علي قلب الزول زي الجرح المونسر
الذي لا يفتا ان ينكأ الا ليطيب ..
نتمنى انها ترجع سيرتها الاولى وايامها الخوالي باذن الله ...
المهم الشباب ديل ادخلوا سرور شديد علي قلبي وفرحوني والله
كنت بتفرج في فيديوهات مدارس الكودة بمديرها ومعلميها ومعلماتها وطلابها وطالباتها واولياء امورهم لحظة اعلان الشهادة السودانية
كم الفرح الهستيري والبهحة والركوع والمقالدة والبكاء
والله بكيت
بكيت وانا وسط شغل ومحاكم وتقارير مرضى مافي زمن احك فيه شعري
خليت اي شيء وشفت الفيديوهات دي
بكيت زين
وفرحت وهللت معاهم .. كل ما يقولوا اسم زول انا قلبي بيرقص
وبالذات المراكز الاولى بنات
وانا بفرح للكل بس فرحي للبنات بكون مضاعف
انا اصلا بحب السمح وبحب النجاح
وبحب اشوف الناس ايا كانوا ماشين قدام
لكن نجاح الليلة دا .. انا شفت فيه رحلة عمرها سنوات من الحرب والتشتت والضياع
اولاد. وبنات صغار
طلعوا من بيوتهم ومدارسهم ويمكن من السودان كله
ومشوا من حتة لحتة
عشان (الحياة تستمر)
لا عمرهم ولا خبرتهم ولا لين عودهم باهلهم لنصب ولا لتعب ولا عنت زي الشافوه دا ...
عود اخضر
قلوب لينه
ونفوس طرية .. ماشافت للدنبا دي شيء
قدامهم غباش عجيب
وعدم وضوح رؤية في اكتر فترة من حياتهم مهمة.. مهمة لتاسيس مستقبلهم وبداية اجتراح لطريق مفروض انه يكون مرصوف وواضح لانه اصلا كدة كدة صعب ومنهك وطويل
وفي الشارع الطويل الماواضح دا
ابهات وامهات
قبلوا بواقع عجيب وبائس ... و عندهم قدرة تكيف ماشاءالله تبارك الله تدرس والله
وامكانية تعاطي مع ماسي ومصايب تنوء عنها الجبال
ماكان عندهم علي مااظن ولا خمسة دقايق للعق جروحهم ولا حتى التربيت علي ظهر انكسارهم وحزنهم ولا حتى الجلوس شوية لمراجعة الطريق من اول وجديد .. طريق مفروض عليهم ومن غير اي اعداد
وعيال في يدهم مفروض يعملوا ليهم (من الفسيخ دا شربات)
نجحوا والله
نجحوا هم قبل المعلمين وقبل العيال
نجحوا علي الثبات والوقفة والاصرار ..
اقيف وانحني والثم قدم من جعل هذا ممكنا ...
الشايلين ضوء الرتاين عديمات الوقود ومصرين علي الاضاءة وصنع فسحة من النور والضياء
هم من يكاد ان يكون رسولا
المعلمين والمعلمات
الاستمروا في تقديم يد العون للعيال ديل وهم لروحهم بعانوا من نفس الظروف الضاغطة المارين بيها العيال ديل واهلهم
ولا انسى الاهل والاحباب والعشيرة وكل من تازر وتناسد ووقف وشد عزم احد .. من قدم المال والنصح والتطبيب والاشادة والدعم وساند كل من مر بمحة نزوح وتشرد وعذاب بلانهايات ...
فرحنا ليكم والله
انا فرحت ليكم وشفت الشارع المشيتوا فيه .. اكاد اقبل اقدامكم والله الملانة جروح من وطاة مسير يدعك تشعر انك كالمنبت لا ارضا قطعت ولا ظهرا ابقيت
لكن مضيتوا كالاقمار
اخدتوا الاولاد ديل لمشارف النور
ربنا يخليهم ليكم وتفرحوا بنجاحاتهم كمان وكمان اصلا انتو اديتوهم درس في الثبات والوقوف والعزم والمثابرة واخراج النجاح دا من بين فرث و دم ...
مبروك الاف المرات ...
ومعليش جدا للماقدروا يحققوا المطلوب وحابة اقول ليهم انتو لسه صغار والحياة قدامكم وباذن الله
السايقة واصلة
قد تطول المسافة قليلا ولكنكم بالغي صنعاء وان طال السفر باذن واحد احد
استمروا بس وباذن الله موفقين للمرات الجاية انتو واهلكم ومعلميكم ...

