المنتدي الشامل للاستاذ عبد العظيم صالح بأم الطيور (4)
المنتدي الاول في السودان الذي يحتفي ويتفاعل مع انتصارات الجيش في حرب الكرامة
استثناء اليوم يفرض نفسه علينا وعليك أيها القارئ الكريم في هذه المساحة الاولي في عموم السودان التي يتفرد لها هذا المنتدي لنتفاعل ونحتفي بانتصارات قواتنا المسلحة الباسلة في حربها ضد المرتزقة والخونة والقوادين داخل وخارج البلاد ومن منا اليوم لا يحتفي بهذه الانتصارات الرائعة في كل محاور البلاد اليوم يوم الفرح لكل من في قلبة ذرة ايمان من الاخلاق والشرف والوطنية ويوم الدعاء والابتهالات لقواتنا المسلحة المظفرة لاكمال بشائر النصر في عموم البلاد
ولله در هذا الشاعر الشعبي حين نظم هذه الكلمات التي تعبر عن ملاين الرجال من الشعب السوداني والحادبين علي مصلحته وامنه واستقراره حين قال باسلوب شعبي بسيط...
استعداد كبير عاجبنا وسمح
الكلاش ملان وسكين الضبح
استعداد كبير ياقحاطي شوف
رايات الجهاد ماشات بالالوف
اصلك للمكارم عينك مابتشوف
ويوم النار تولع الا تقوموا صوف
الكلاش ملان وسكين الضبح
استعداد كبير ياديوك الغبا
وشروط القحاطه الليله اشطبا
الكلاش ملان وسكين الضبح
ورقة الاطاري بلها اشربا
والدين والفضائل تاني نكتبا
الكلاش ملان وسكين الضبح
نحن في الكتال اسودنا مجربا
وباليوم العبوس اهلا مرحبا
الكلاش ملان وسكين الضبح
اولادنا الشباب ليهو مدربا
وجاهزين للجهاد مافي زول ابي
الكلاش ملان وسكين الضبح
اب فرار يهز واب خنجر ظهر
واب عودا غليد فوق راسوا انكسر
الكلاش ملان وسكين الضبح
ديل خاضوا ام لهيب والرصاص مطر
وديل المؤمنين مافيهم كفر
الكلاش ملان وسكين الضبح
اب شوتال مرق
وحاشا ما اندرق
الكلاش ملان وسكين الضبح
في البحر أب لطام بظهر الغرق
والخاين العميل براااحه انسرق
إستعداد كبير عاجبنا وسمح
الكلاش ملان وسكين الضبح
السودان يعود والحال ينصلح
فوقنا النيل يفيض والخزان ينح
الكلاش ملان وسكين الضبح
نعز الوطن ونداوي الجرح
وتقالد الغصون سنابل القمح
الكلاش ملان وسكين الضبح
اشعار الجندي المجهول
ومع هذه الانتصارات المبشرة بتحرير الخرطوم كاملة نري صدق من قال في هذا متفائلا بنهاية الحرب وادامة الامن والأمان والسلامة والسلام لعموم البلاد والعباد انظر أخي العزيز الي هذه الصورة المعبرة عن فرحة المواطن بعد ايام قضاها في صلب المعاناة ولكن تكافل الشعب السوداني وشيمه الكريمة في فن التعامل مع بعضهم البعض امتص كثير من المعاناة التي نصبت لها بعض الدول المخيمات وأبواب المنظمات لسد الفجوة الاجتماعيه ولكن ثقافة الشعب السوداني بعمل التكايا التكافلية وتضامنه مع الجيش كان من العوامل الأساسية لتحقيق الانتصار اقرأ هذه العبارات اللطيفة ادناه ....
نحمد الله سلم وطنا
شرفوا وزارونا اهلنا
القلوب زادت محنا
وكل جافي صبح احنه
مافي نازحين
مافي لاجئ
لا مخيم
لا ملاجي
كل زول شرف ديارو
يحكي لي اهلوا ويناجي
الكريم عمانا رحمه
لا مضايقه لا في زحمه
البلد ترسوها ناسا
حكمه والسيف المواسا
ركزوا ثابتين في دواسا
واصبحت ضمن الاحاجي
نحن رضيانين قدرنا وربنا ادانا القدرنا
للاحبه وسع صدرنا
نقسم الكان في قدرنا
السعاده الفي عمرنا
ليها غنينا ورطنا
نحن بالضيفان فرحنا
بي سماحتهم سمحنا
رحبت دارنا انشرحنا
عيشنا واتبارك قمحنا
الدبكري الواسع قدحنا
تهنا بالونسه وسرحنا
والطبيعه نشوفه جنه
ياعظيم العزه ماجد
ياخليل كل المساجد
يامقيم الليل وساجد
اشرقت فيك المحامد
جبت مبروك جبت عابد
وكانت احلي ايام زمنا
وقد تضامنت بعض الشعوب العربية معنا في معاناتنا هذه وقاسمتنا الألم والمعناة فالتحية نزجيها من هنا لدولة قطر الشقيقة قطر الخير لؤلؤة الخليج العربي حكومة وشعبا والتحية العظمي للقيادة المصرية والشعب المصري علي هذه الوقفة الصلبة ليقوي من عزمنا ومن ارادتنا لحماية جنوب وادي النيل الذي نتقاسم معه خيره وشره في جنوبه وفي شماله ولله در الشاعر المصري حين قال منشد عن توحد الأمة العربيه فأصبح نشيده من أعذب الأناشيد الوطنية في جنوب الوادى ولله دره في قصيدته هذه التي نشرت في أكتوبر 1967 في مجلة العربي فاختارتها الإذاعة المصرية لتغنيها فايزة أحمد من ألحان محمد سلطان. كما قام بتلحينها في السودان كلٌ من محمد حميدة، ويوسف السماني. وأمر الرئيس السوداني جعفر النميري بإذاعتها، وأصبح من الأناشيد المشهورة في السودان. ومن كلمات النشيد:
أمتى يا أمة الأمجاد والماضي العريق
يا نشيداً في دمى يحيا ويجرى في عروقي
أذن الفجر الذى شق الدياجي بالشروق
وطريق النصر قد لاح فسيرى في الطريق
***
قبلة الأنظار يا أرض الهدى والحق كنتِ
ومناراً في دجى الأيام للعالم عشتِ
أنت مهد النور ..مهد الفن
والعرفان انت
وستبقين ويبقي لك منا ما اردت
هكذا هو حب الوطن والولاء له بكل صدق ووفاء وتضحية كمال قال شاعرنا يوسف مصطفي التني هذه الكلمات الرائعات التي تغني بها وبحب الوطن الفنان الشعبي بادي محمد الطيب كلمات هذه القصيدة تشف عن الوطنية الخالدة في نفوس أبناء الوطن الاوفياء
في الفؤاد ترعاه العناية
بين ضلوعي الوطن العزيز
لي عداه بسوي النكاية
وان هزمت بلملم قواي
غير سلامتك ما لي غاية
إن شاء الله تسلم وطني العزيز
***
ليه ما ارعي الوطن الرعاني
والدهاه اشيله واعاني
الشباب والشيب شجعاني
قالوا نفدي الوطن العزيز
***
بقاسمه حظه سواده وبياضه
وايه مرادي انا غير مراده
ارعي نيله اشجع بلاده
يشيلوا حمل الوطن العزيز
***
عندي وطني بقضيلي حاجة
كيف اسيبه واروح لي خواجه
يغني وطني ويحيجني حاجة
لي عدوك ياوطني العزيز
***
طبيعي اعشق صيده ورماله
وما ببيعه واقول مالي ماله
وما بكون آلة البي حباله
داير يكتف وطني العزيز
***
علمونا اهل الحضارة
كيف اضوق شان وطني المرارة
والمحن برضاي اصلي ناره
خوفي تحرق وطني العزيز
***
شفنا فيه جواب فيافي
والبطير وبسابق السوافي
ما مراده عفارم عوافي
بس يعظم وطني العزيز
***
نحن للقومية النبيلة
ما بندور عصبية القبيلة
تربي فينا ضغائن وبيلة
تزيد مصايب الوطن العزيز
حب الوطن هو وصية الله علي لسان رسوله الكريم صلي ألله عليه وسلم حين قال (حب الوطن من الايمان)
ولذلك كانت لنا هذه الوصية من جدودنا الاوائل يوم اوصونا لكي نحفظ هذه الوصية ....
جدودنا زمان وصونا علي الوطن علي التراب الغالي الما ليهو ثمن نحن حافظين للوصية جوه في قلوبنا الوفية ذكراهم بتلهمنا وتشجينا بعزيمة قوية ليك يابلدنا عاد صارفين روح ونية صاينين للتراب وحافظين للوصية بسواعدنا القوية حققنا استقلالنا ورفعنا علم الحرية بيهوا الشعب احتفل يوم جمع صفوفو واتشمر للعمل بي وحدة نضالو كم حقق امل ...
وقد تحتم علي كل مواطن ينتمي بتراب هذا الوطن العزيز حبه والدفاع والزود عنه وعن حياضه وبذل الغالي والنفيس فداءا له والكرامة شعبه ولهذا قد ظهر فرسان السودان في حرب الكرامة وبذلوا المهج والانفس في سبيل رفع رأية المجد الي العلا حتي وصفوا فارسهم بقولهم الحقيقي في بطولته الخارقة التي تم تجديدها وتنفيذها اليوم في حرب الكرامة السودانية إذ تقول شاعرتهم الفصيحة (رقيه) في اخيها ود حبوبه الفارس الذي صمد في وجه المستعمر الدخيل حتي تم إعدامه وشنقه ظلما وغدرا فاوصفته بقولها
بتريد اللطام أسد الكداد الزام
هزيت البلد من اليمن للشام
سيفك للفقر قلام
ديّم في التقر انصارو منزربين
بالصفا واليقين حقيقة أنصار دين
بالحرب أم طبائق قابلوا المرتيين
في وش المكن رقدوا التقول نايمين
ديّم في التقر انصارو زاربنو
بعهدوا القبيل بعيسى تاهمنوا
اتلموا العمد ليهم نقر سنوا
الهوج والشرق طار المنام منوا
ديّم في التقر قال العمير للسوم
القوى والضعيف من عينو طار النوم
الكفرة النجوس مابختوا من اللوم
حجرت الدرب خليت جمالهم تحوم
الأسد النتر وقال الدين منصور
لمولوا الاورط جابوهم بالبابور
العمد الكبار كلامهم بقى مدحور
كم فقشت مدير وكرمت بالمأمور
الأسد النتر بى جيهة الأبقار
لمولو الاورط شايلين سلاح النار
ود حبوبة قام ورتب الأنصار
في كتفيه ديك كم شبعن صقار
الإعلان صدر واتلمت المخلوق
بى عيني بشوف أب رسوة طامح فوق
كان جات بالمراد واليمين مطلوق
ما كان بنشنق ود أب كريق في السوق
الإعلان صدر واتلمت الحلال
نصبولو السلاح واتكرنف الخيال
قدر الله الحصل والزمان ميال
منسول من أبوك ماك ود حرام دجال
بتكلم بقول بوريك شن حسبوا
نايبو السنين منّو الرجال حسبو
كل الخاصموك في الآخرة ما كسبوا
التبعوك جنود لله ما انتسبوا
رضوان الإله تملأ الضريح كافور
مسك الرحمه لاح منو يلوح النور
اغفر سيئات كل من يجيك زور
في الفردوس هناك يتمنى مهما يدور
يأبي الاعداء لنا ان نعيش في سلام وان ننعم بخيرات بلادنا الوافرة العظيمة ويحسدوننا علي تماسك هذا النسيج الاجتماعي حين سعوا لتفكيك دولتنا ولتغير هويتنا بما يسمي بالتغير الديمقرافي ولكن عبقرية الجيش والهام الشعب فوتا هذه الفرصة علي هؤلاء المتآمرين وشربوا من نفس الكأس الذي اعدوه لنا وسنبقي بحول الله قوة صلبة وشعب عبقري مذهل معلم الأجيال علي مدي التاريخ ما بقيت في الارض حياة
وشعارنا في قول ابي الطيب المتنبي
لا يسلم الشرف الرفيع من الاذي
حتي يراق علي جوانبه الدم
نواصل ان شاء الله في منتدي المنتديات للاستاذ عبد العظيم صالح القارئ الحصيف والمحلل السياسي الشفيف